U pitanju je jednostavna igrica “Flappy Android”, uz koju možete da skratite svoje vrijeme dok čekate u banci, pošti, kod ljekara… Da biste pristupili igrici ne morate ništa posebno da preuzimate na svoj pametni telefon.
 
Dovoljno je da uđete u “Postavke” (Settings), odaberete opciju “O telefonu” (About Phone) i pronađete broj Android verzije. Kucnite po tom broju nekoliko puta i na ekranu bi trebalo da vam se pojavi odgovarajući Android logo (lizalica ili kolačić), piše “b92“.

Kucnite po logu još nekoliko puta i potom dugo držite prst na ekranu, sve dok se igrica ne pojavi. Glavni lik u igri je Androidov robot, a kao i kod igrice “Flappy Bird”, morate da izbjegavate prepreke što je duže moguće. I novije verzije Androida (Nougat i Android O) kriju zanimljivu igru, ali se do nje nešto teže dolazi.

Radi se o igrici “Android Neko”, u kojoj igrač skuplja mačke. Da biste joj pristupili ponovno morate u “Postavkama” odabrati “O telefonu” i kuckati po verziji Androida dok vam se ne pojavi logo Nougata.

Kucnite još nekoliko puta i potom pritisnite toliko dugo dok vam se na dnu ekrana ne pojavi mali emoji mačke. Dva puta povucite prstom od vrha ekrana, da biste ušli u brzi meni i odabrali “Uredi” (Edit) u donjem desnom uglu.

Na samom dnu liste pronaći ćete “Android Easter Egg”. Dugo pritisnite na tu opciju i prevucite je na vrh, kako biste mogli da joj brzo pristupite u svakom trenutku. Ikona izgleda kao prazan tanjir ili činija za hranu.

Kliknete li na nju i biće vam ponuđeno nekoliko vrsta “mamaca” – riba, kokoška, krofna ili mačja hrana. Na vama je da pričekate da se maca ulovi u vašu zamku. A kada se to dogodi, na vrhu ekrana ćete dobiti poruku “Mačka je ovdje” i njen “serijski broj”. Ako Kliknete na macu, ući ćete u poseban meni gdje možete da vodite evidenciju koje ste i koliko maca ulovili.

(Merima Druškić)